Një ngjarje tronditëse dhe thuajse e pabesueshme ka ndodhur në Napoli, ku pasioni për futbollin është shndërruar në një tragjedi familjare.
Gjatë ndeshjes mes Atalantës dhe Napolit, e përfunduar me rezultatin 2-1, një 40-vjeçar ka rënë pre e një sulmi të dhunshëm nga bashkëshortja e tij brenda shtëpisë. Shkak i sherrit ka qenë momenti kur arbitri, pas rishikimit të sistemit VAR, anuloi një penallti në favor të napoletanëve, veprim që solli shpërthimin në të shara të tifozit.
Sipas raportimeve, bashkëshortja 35-vjeçare i keqinterpretoi këto sharje, duke menduar se ato ishin të drejtuara ndaj saj. Në gjaknxehtësi e sipër, ajo fillimisht i hodhi sende të mprehta dhe më pas mori një thikë kuzhine me të cilën e plagosi burrin e saj.
Policia ndërhyri në kohë rekord pas telefonatës së të plagosurit, duke arrestuar gruan për dhunë në familje dhe plagosje të rëndë, ndërsa 40-vjeçari ndodhet në spital jashtë rrezikut për jetën.
