Ditët e fundit është përfolur për një rikthim të mundshëm të Jorgo Pëllumbit në Superiore. Mbrojtësi korçar ka mbyllur kontratën me Debrecenin dhe për momentin është lojtar i lirë në merkato.
Mësohet se pasi mbylli kontratën me skuadrën hungareze, Pëllumbi është kontaktuar nga Dinamo, me trajnerin Ilir Daja që e njeh shumë mirë, nga koha te Skënderbeu, kur i dha mundësinë të tregonte talentin e tij.
Megjithatë, “Vetëm Sport” mëson ekskluzivisht se bisedimet janë ndalur dhe një transferim i Pëllumbit te “Nëndetësja” duket i vështirë për momentin.
Lojtari është në bisedime edhe me një ekip europian, emri i të cilit nuk bëhet i ditur, por kemi zbuluar se merr pjesë rregullisht në kupat e Europës.
Dëshira e korçarit është të vazhdojë të luajë jashtë, por në rast se kjo nuk realizohet, nuk përjashtohet mundësia e një rikthimi në Superiore.
