Java e nëntë e Superiores, është mbyllur me dy ndeshje spektakolare dhe shumë të luftuara.
Elbasani triumfoi 4-1 ndaj Tiranës në “AIr Albania”, në një takim me rivalitet të madh gjatë gjithë kohës.
Bardheblutë e nisën mirë, me disa raste për shënim, por nuk kishin saktësinë e duhur para portës.
Nga kjo përfitoi Elbasani, që shënoi dy herë në pjesën e parë. Tsague zhbllokoi takimin në minutën e 38-të, duke shënuar pas një topi të kthyer nga tentativa e Mustës.
Pesë minuta më vonë, ishte i njëjti protagonist që realizoi edhe të dytin, këtë herë pas një pasigurie të portierit Tafas.
Në pjesën e dytë, Tirana u fut me qasje tjetër dhe ngushtoi shifrat në minutën e 66-të me Tabekou. Pas këtij goli, bardheblutë u hodhën në sulm, në kërkim të barazimit dhe lanë hapësira në prapavijë, të cilat u shfrytëzuan nga miqtë me dy kundërsulme vrastare.
Ze Gomes realizoi të tretin në minutën e 92-të, ndërsa Diallo vulosi takimin me golin e katërt në minutën e 96-të.
Me këtë fitore, Elbasani mban vendin e tretë me 17 pikë, ndërsa Tirana renditet e parafundit me vetëm gjashtë pikë të grumbulluara.
Në duelin tjetër, Dinamo fitoi 2-0 në derbin e kryeqytetit ndaj Partizanit. Pjesa e parë u mbyll pa gola, pavarësisht rasteve të shumta nga të dyja ekipet.
Në të dytën, blutë u treguan më cinikë dhe ia dolën të marrin fitoren. Sfida u zhbllokua në minutën e 54-t, nga një autogol i Atanaskoskit.
Në minutën e 76-të, Neziri, i sapofutur në fushë, realizoi edhe të dytin, për të mbyllur ndeshjen.
Fitorja e ngjit Dinamon në vendin e katërt me 17 pikë, ndërsa Partizani renditet i teti me tetë pikë.
