Fitorja e Shqipërisë në miqësoren ndaj Gjibraltarit, edhe pse me rezultat minimal, i ka shërbyer trajnerit Silvinjo që të përmirësojë statistikat në drejtimin e kuqezinjve.
Në atë që ishte ndeshja e 27 në drejtim, ai ia doli që të siguronte fitoren e 11-të, ndërsa ka regjistruar edhe 7 barazime e 9 humbje. Kjo e sotmja ishte fitorja e katërt në një miqësore për Shqipërinë nën drejtimin e brazilianit.
Duke arritur në numrin e 11 fitoreve në pankinën e kuqezinjve, Silvinjo barazoi kësisoj numrin e sukseseve të regjistruara nga Hans Peter Brigel, duke u ngjitur në vendin e tretë në podiumin e kësaj statistike, teksa e ka bërë me 4 ndeshje më pak në drejtim se trajneri gjerman.
Tani përpara ka vetëm dy trajnerët italianë, Xhani De Biazi dhe Edi Reja. Për të arritur Rejan, i cili u ndal në kuotën e 14 fitoreve, do i duhet mrekulli në ndeshjet e mbetura në këto kualifikuese. De Biazi dhe 21 fitoret e tij janë të pakapshme, pasi për të synuar atë numër, do i duhej një… rinovim kontrate.
