Skenderbeu-Kastrioti
Klubi i Kastriotit ka marrë më në fund dritën jeshile nga FIFA për të regjistruar futbollistët e afruar gjatë merkatos. Krutanët kishin aplikuar prej kohësh në FSHF për regjistrimin e federimeve të reja, por pengoheshin nga pezullimi i vendosur nga organi më i lartë i futbollit botëror.
Shkak për këtë bllokim ishin bërë tre çështje të humbura në gjyqet ndërkombëtare për shkak të dështimit në shlyerjen e detyrimeve ndaj palëve të treta.
Për shkak të vonesës së pagesave, Kastrioti u paraqit në sfidën e javës së parë ndaj Burrelit me vetëm 15 futbollistë të gatshëm dhe pa asnjë portier rezervë në pankinë. Megjithatë, skuadra krutane tregoi karakter duke marrë një pikë mjaft të rëndësishme në atë përballje sfiduese.
Dita e sotme solli lajmin e mirë pasi drejtuesit mbyllën përfundimisht të gjitha detyrimet financiare, duke bërë që FIFA t’u heqë bllokimin. Tashmë klubi krutan duhet vetëm të përfundojë procedurat e regjistrimit në federatë për t’i pasur lojtarët e rinj të gatshëm për vazhdimësinë e kampionatit.
