Shqipëria ka fituar vende në renditjen e fundit të FIFA-s pas dy fitoreve të tetorit ndaj Serbisë dhe Jordanisë.
Të dyja ndeshjet, përballë kundërshtarëve me koeficient të lartë, kanë ndikuar pozitivisht në grumbullimin e pikëve. Sipas renditjes së re, kuqezinjtë janë ngjitur me pesë pozicione dhe tani renditen në vendin e 61-të në botë.
Ky rezultat e forcon Shqipërinë në vazon e tretë për shortin e “play-off”-it të Botërorit. Edhe Kosova ka pasur një muaj pozitiv, duke marrë katër pikë ndaj Sllovenisë dhe Suedisë.
Përfaqësuesja e drejtuar nga Franco Foda është ngjitur me shtatë pozicione dhe tani renditet e 84-ta në botë. Ky është një rezultat rekord për “Dardanët”. Të dyja përfaqësueset shqiptare shihen si pretendente për një vend në fazën “play-off” të kualifikuesve të Botërorit.
