Anis Mehmeti ka qenë një nga emrat më të përmendur gjatë grumbullimit të tetorit, për shkak të mungesës së tij në Kombëtare. Interesi i madh nga opinioni sportiv lidhet me faktin që ai shihet si një alternativë e vlefshme për skuadrën kuqezi.
Megjithatë, gazetari Tami Kona ka deklaruar në emisionin “5 pyetjet nga Babaramo” se gjatë kohës kur ishte në Serbi ka mësuar që Mehmeti i ka vendosur kushte trajnerit Silvinjo. Sipas tij, lojtari i Bristolit ka kërkuar të aktivizohet vetëm në krahun e majtë të sulmit.
“Ne kemi një futbollist tjetër, Mehmetin, që luan në një ligë si Championship-i në Angli. Por nga informacionet që paskam unë, ai na paska vënë ca kushte. “Shiko profesor, unë vij, por luan vetëm në krahun e majtë”. I kam marrë këto informacione tani, kur isha në Serbi. Nuk i dija. Mund të jenë të vërteta, mund të mos jenë të vërteta. Por në ekipin kombëtar nuk mund të vish dhe të vësh kushte”, ka thënë Tami Kona.
