Në ditët e fundit të merkatos së verës, emri i Benjamin Pavard po përflitet së tepërmi. Mbrojtësi francez, aktualisht pjesë e Interit, nuk shihet më si një element i pazëvendësueshëm në formacionin zikaltër, dhe gjithnjë e më tepër po shtohen gjasat që ai të largohet nga Milano përpara mbylljes së afatit kalimtar.
Në javët e fundit janë raportuar kontakte nga Turqia, ku Galatasaray ka shfaqur interes për të siguruar shërbimet e mbrojtësit.
Në të njëjtën kohë, ka pasur oferta edhe nga Lindja e Mesme, konkretisht nga projekti i ri futbollistik në Arabinë Saudite, ku klubi i Neom ka shfaqur gatishmëri për ta bindur me një kontratë të rëndësishme financiare.
Një tjetër pistë është ajo e rikthimit në Francë. Ish-klubi i tij, Lille, ka qenë i interesuar të rikthejë lojtarin që u formua dhe u afirmua aty përpara se të kalonte në Bundesliga dhe më pas në Serie A. Por në këtë rast, pengesat janë të mëdha. Klubi francez nuk ka kapacitetet financiare për të përballuar kërkesat e larta të pagës së mbrojtësit.
Në këtë situatë, është shfaqur një opsion i ri dhe i rëndësishëm: Barcelona. Sipas të përditshmes sportive spanjolle Sport, Pavard i është propozuar klubit katalanas në këto ditë të fundit të merkatos.
Barcelona ka qenë e interesuar edhe më herët për francezin, ndërsa këtë herë skenari bëhet edhe më i mundshëm falë një rrethane të veçantë: trajneri aktual Hansi Flick e ka pasur lojtarin nën urdhrat e tij gjatë periudhës te Bayern Munich.
Njohja mes të dyve shihet si një faktor që mund të ndikojë pozitivisht, pasi Flick e konsideron Pavard një përforcim të vlefshëm për repartin e mbrojtjes.
