Anis Mehmeti vazhdon të shkëlqejë në Angli, aty ku është pjesë e skuadrës së Bristol City, në Championship.
Sulmuesi shqiptar ishte sërish protagonist për ekipin e tij, këtë herë në fitoren 4-2 ndaj Hull City në shtëpi.
Miqtë kaluan të parët në avantazh në minutën e 3-të, por Bristol përmbysi rezultatin shpejt.
Pas golit të barazimit në minutën e 18-të nga Riis, ishte radha e Mehmetit për të shënuar. Futbollisti kuqezi shfrytëzoi një top të marrë në zonë në minutën e 32-të dhe shënoi golin e përmbysjes.
Në fund, shqiptari asistoi edhe për golin katërt, që vulosi fitoren, i shënuar nga Bird në minutën e 78-të.
Mehmeti u zgjodh si lojtari më i mirë i ndeshjes, ndërsa në katër ndeshjet e para, numëron dy gola të shënuar dhe një asist. Vlen të përmendet se pavarësisht formës së shkëlqyer, për lojtarin mungon ende ftesa nga trajneri Silvinjo në Kombëtare.
