Egnatia triumfoi minimalisht ndaj Dinamos, në supersfidën e javës së 25-të në Superiore.
Rrogozhinasit iu falën një goli të shënuar në fund, për të marrë 3 pikë të arta, që i rikthejnë në garë për kreun e renditjes.
Ndeshja nisi e qetë dhe me raste të pakta në të dyja portat. Fraksioni i parë u mbyll me rrjeta të paprekura, ndërsa edhe e dyta ishte me të njëjtën tablo.
Kur dukej se ndeshja do të mbyllej në barazim, erdhi edhe goli që vulosi takimin. Në minutën e 92-të, ishte afrimi i merkatos, Alfonso De Oliveira Rodrigues, i cili shënoi golin e vetëm, duke bërë që të shpërthejë festa te vendasit.
Me këtë fitore, Egnatia mban vendin e dytë me 46 pikë, 2 më pak se Vllaznia kryesuese. Dinamo mban vendin e katërt me 36 pikë, por rrezikohet nga Partizani, që ndodhet 3 pikë më pak dhe ka një ndeshje më shumë të luajtur.
