Sulmuesi i Partizanit, Xhuliano Skuka, ka fituar zyrtarisht betejën ligjore me ish-klubin e tij rumun, Politehnika Iași, në Dhomën e Zgjidhjes së Mosmarrëveshjeve në FIFA.
Vendimi, i marrë në tetor të vitit 2025, detyron klubin rumun të shlyejë detyrimet kontraktuale të prapambetura për periudhën prill-qershor 2025. Gjatë aventurës së tij në Rumani, Skuka kishte firmosur një kontratë me pagë mujore prej 7,300 eurosh dhe një bonus firmosjeje prej 7,000 eurosh, por klubi nuk i kishte paguar detyrimet për muajt e fundit të bashkëpunimit.
Pas mungesës së reagimit nga Politehnika Iași ndaj njoftimeve zyrtare, sulmuesi e dërgoi çështjen në organet e drejtësisë sportive në gusht të vitit të kaluar.
Sipas vendimit të FIFA-s, klubi rumun duhet t’i paguajë lojtarit shumën prej 17,333 eurosh, së bashku me një interes vjetor prej 5% për çdo muaj vonese. Përveç dëmshpërblimit ndaj sulmuesit shqiptar, FIFA ka ndëshkuar klubin edhe me një gjobë prej 1,000 dollarësh amerikanë. Skuka e mbylli përvojën e tij te Iași me 15 ndeshje dhe tre gola të shënuar, përpara se të rikthehej te Partizani në verën e vitit 2025.
Aktualisht, 27-vjeçari është shndërruar në liderin e repartit ofensiv të “Demave të Kuq”, ku pavarësisht problemeve fizike në fillim të sezonit, ka shënuar gjashtë gola në 20 paraqitje dhe ka udhëhequr ekipin si kapiten në fitoren e fundit në derbi ndaj Tiranës.
