Klubi i Tiranës ka mirëpritur rikthimin e mesfushorit Fredi Alvarez në kryeqytet, pas periudhës më të vështirë të jetës së tij. Më 24 janar të këtij viti, 30-vjeçari humbi tragjikisht vajzën e tij të vogël, një ngjarje që tronditi thellë ambientin bardheblu dhe mbarë opinionin publik.
Pas një muaji qëndrimi në vendlindjen e tij, Kosta Rika, ku u përpoq të përballonte dhimbjen e madhe pranë njerëzve të tij të dashur, Alvarez ka vendosur të kthehet në Shqipëri për të respektuar kontratën dhe për t’u bashkuar me pjesën tjetër të skuadrës.
Përmes një postimi prekës në rrjetet sociale, Alvarez ndau me ndjekësit vështirësinë e të jetuarit me këtë humbje, duke u shprehur se “pikëllimi nuk ka orë” dhe se çdo kujtim sjell një “lëmsh në fyt që dhemb shumë”.
Megjithatë, rikthimi i tij në fushën e stërvitjes konsiderohet si një akt i lartë profesionalizmi dhe force karakteri. Ardhja e tij në fillim të janarit ishte parashikuar si një përforcim cilësor për mesfushën e Tiranës, dhe tashmë prezenca e tij shihet si një impuls emocional dhe teknik për ekipin në këtë fazë vendimtare të kampionatit.
