Çështja Ardon Jashari-Milan është kthyer në një telenovelë me shumë episode, pasi tratativat mes klubit italian dhe Club Bruges kanë ngecur.
Klubi belg refuzoi ofertën e fundit prej 33.5 milionë euro plus bonuse, duke këmbëngulur për një çmim prej 40 milionësh. Ndërkohë, Jashari, i cili dëshiron t’i bashkohet Milanit dhe Igli Tares, po ushtron presion për të realizuar transferimin, madje mungoi edhe në ndeshjen hapëse të kampionatit. Bruges po pret oferta të tjera, sidomos nga Premier League, për të maksimizuar përfitimin financiar.
Milan mbetet në pritje, por nuk mund të presë pafund. Si alternativë, Igli Tare po konsideron Javi Guerrën e Valencias, edhe pse klubi spanjoll kërkon 25 milionë euro për ta lënë të lirë. Në këtë fazë, gjithçka mbetet e hapur dhe në pritje të zhvillimeve të reja.
