Leon Phols u afrua me bujë te Vllaznia dhe u cilësua si përforcim i rëndësishëm për portën, por paraqitjet e treguara deri tani janë larg pritshmërive.
Në miqësoren ndaj Kukësit, portieri gjerman bëri dy gabime që sollën dy gola për kundërshtarin. Këto momente ngjallën dyshime brenda klubit, pasi pritshmëritë për ish-portierin e Shamrock Rovers ishin të larta.
Pas zhgënjimit me Arsid Krujën, i cili gjithashtu u afrua këtë verë dhe u largua sërish, tashmë dyshimet janë shtuar edhe për Phols.
Për trajnerin Martini dhe stafin e tij, porta mbetet një çështje e hapur përpara nisjes së sezonit 2025-26. Favorit për rolin e titullarit është Aron Jukaj, i cili ka fituar besimin me paraqitjet e tij. Portieri 20-vjeçar u aktivizua si titullar pas largimit të Qarrit, duke treguar siguri në ndeshjet ndaj Vikingur.
Ai kishte spikatur edhe sezonin e kaluar kur, pas dëmtimit të Qarrit, mori vendin e titullarit dhe u vlerësua si një nga zbulimet e Superiores. Aktualisht, Jukaj shihet si alternativa më e besueshme për portën e shkodranëve.
