Albion Ademi është zyrtarisht futbollisti i ri i skuadrës kineze Shenzhen Peng City. Sulmuesi 26-vjeçar u transferua te ky ekip pas mbylljes së aventurës së tij me Tianjin Jinmen Tiger.
Kalimi i futbollistit u krye si lojtar i lirë, pasi kontrata e tij me klubin e mëparshëm kishte përfunduar. Skuadra e tij e re, e njohur ndryshe si “blutë” e Superligës kineze, nuk pagoi për këtë transferim.
Ademi do të vijojë karrierën e tij profesionale brenda të njëjtit kampionat në Kinë. Në të kaluarën, futbollisti ka qenë pjesë e Kombëtares shqiptare për moshën U21.
Ai regjistroi gjithsej pesë paraqitje me këtë ekip pas debutimit të tij në vitin 2018. Megjithatë, sulmuesi nuk ka arritur të bëhet pjesë e ekipit përfaqësues të nivelit A.
