Situata politike dhe protestat masive në Iran kanë krijuar panik për sigurinë e dy futbollistëve shqiptarë, Jasir Asani dhe Regi Lushkja.
Prej një jave, të dy lojtarët që aktivizohen përkatësisht me Esteghlal dhe Traktor FC, nuk kanë pasur kontakte me rrjetet sociale apo botën e jashtme.
Shkak për këtë izolim është bërë ndërprerja e sinjalit të internetit dhe telefonisë celulare nga autoritetet vendase si pasojë e trazirave. Raportohet se trajneri i Esteghlal, Rikardo Sa Pinto, është strehuar në ambasadën portugeze në Teheran për arsye sigurie. Edhe klubet e futbollit kanë pezulluar aktivitetet e tyre në platformat online, duke e bërë të vështirë marrjen e informacioneve të sakta.
Aktualisht, nuk ka asnjë njoftim zyrtar mbi gjendjen specifike të Asanit dhe Lushkjas në mes të këtij kaosi. Ky bllokim komunikimi ka rritur shqetësimin për mirëqenien e shtetasve të huaj që ndodhen në territorin iranian.
