Tifogrupi “Vllaznit Ultras” ka dalë me një thirrje publike drejtuar të gjitha tifogrupet në Shqipëri, duke kërkuar bashkim dhe reagim ndaj mënyrës se si po organizohen ndeshjet e kampionatit.
Në deklaratë theksohet se futbolli është një sport që luhet për tifoza, e jo për njerëz me kollare apo interesa personale. “Vllaznit Ultras” kujtojnë se situata ekonomike në vend e bën të vështirë ndjekjen e ekipeve në çdo qytet, ndaj ndeshjet duhet të luhen në fundjavë, si në çdo vend tjetër, për të mundësuar pjesëmarrjen më të gjerë të tifozëve.
Sipas tyre, zhvillimi i ndeshjeve në mesjavë dhe në orare të papërshtatshme u shërben vetëm interesave të organizatorëve, jo dashurisë për skuadrat. Thirrja u drejtohet “Tigrave Verdh e Blu”, “Arrakatëve”, “Ultras Guerrils”, “Tirona Fanatics”, “Djemve të Detit” dhe “Flotës Kuq e Zi” për të ndërmarrë një aksion të përbashkët mbi këtë çështje.
Po ashtu, grupi kërkon që drejtuesit e klubeve të mos bëhen palë me interesat e federatës, por të mbrojnë tifozët besnikë të tyre. Mesazhi përmbyllet me fjalët: “Pa ne, futbolli në këtë vend është i vdekur.”
POSTIMI:
Thirrje per krejt tifogrupet ne Shqipni.
Futbolli asht nji sport qe luhet per tifoza dhe jo per njerz me kollare dhe interresa personale. Krejt e dina gjendjen ekonomike te ktij vendi ku veshtirsite per t’ndjek ekipin e zemnes jane te medha.
Futbolli ne tan boten luhet ne fundjave qe pjesmarrja e tifozave te jete sa me e madhe qe ekipi te mbeshtet ne maksimum.
Tek ne bahet e modes te luhet ne mesjave dhe ne orare t’papershtatshme, qe kjo gja i sherben vec skemave te organizatorve dhe jo pasionit dhe idealit tone.
Fillimisht thirrja u drejtohet krejt tifogrupeve: Tigrat Verdh e Blu, Arrakat, Ultras Guerrils, Tirona Fanatics, Djemt e Detit, Flota Kuq e Zi qe te ndermerret nje aksion i perbashket nga ne per kete teme.
Gjithashtu thirrja i shkon edhe kryesive te klubeve qe mos te bahen pale e interresave te federates por te bahen pal e interresave te tifozave besnik te tyne qe cdo jave sakrifikojme.
Pa ne futbolli ne kete vend asht i vdekun!
