Një tragjedi e rëndë familjare ka tronditur opinionin publik në Itali, ku një futbollist i ri shqiptar, i cili luante në ligat amatore dyshohet se ka rrahur nënën e tij deri në gjendje kome, përpara se t’i jepte fund jetës duke u mbytur në det. Ngjarja e tmerrshme ndodhi në qytezën e Pollenza-s, pikërisht në ditën e 20-vjetorit të lindjes së lojtarit shqiptar, Riccardo Merkuri.
Sipas raportimeve, Riccardo po darkonte me nënën e tij, 53-vjeçaren me origjinë shqiptare Albana Kastrioti, ndërkohë që babai dhe vëllai i tij ishin jashtë shtëpisë. Një sherr i çastit mes të dyve ka degjeneruar në dhunë ekstreme. Fqinjët, të alarmuar nga britmat, njoftuan policinë, e cila kur mbërriti në banesë gjeti gruan pa ndjenja në banjë, të mbuluar nga gjaku.
I gjendur në gjendje shoku dhe me mendimin se kishte vrarë nënën e tij, futbollisti i ASD Montemilone Pollenza u largua me shpejtësi drejt Civitanova Marche. Kamerat e sigurisë kanë filmuar momentin kur ai u hodh në ujërat e portit.
Edhe pse doli një herë nga uji, ai hoqi xhaketën dhe u hodh sërish për të dytën herë. Trupi i tij u gjet nga polumbarët pas 38 orë kërkimesh, ndërsa mjekësia ligjore konfirmoi se shkaku i vdekjes ishte hipotermia dhe mbytja. Nëna e tij, Albana, vazhdon të jetë në gjendje të rëndë në spital.
