Afrohet momenti vendimtar për Kombëtaren shqiptare, që kërkon për herë të parë në histori kalimin në Play Off-in e Botërorit. Shqipëria ndodhet shumë pranë objektivit, por gjithçka mbetet e hapur deri në përfundim të llogarive matematikore.
Për kualifikim zyrtar kërkohen disa skenare, ku më kryesori është fitorja ndaj Andorrës dhe një rezultat i favorshëm në ndeshjen Angli–Serbi. Kombëtarja shqiptare vuan pasojat e pikëve të humbura ndaj Letonisë, ndonëse fitorja ndaj Serbisë ka rikthyer shpresën.
Anglia, tashmë e kualifikuar, mund të përcaktojë fatin e Shqipërisë në grup. Golavarazhi i saj mbetet i frikshëm, 18 gola të shënuar dhe asnjë i pësuar, ndërsa fitorja 5-0 në Beograd tregon forcën e skuadrës. Marrëdhëniet politike mes Serbisë dhe Britanisë janë të tensionuara, çka mund të ndikojë në atmosferën e ndeshjes.
Megjithatë, trajneri Tuchel ka paralajmëruar se ndaj Serbisë dhe Shqipërisë do të aktivizojë lojtarët e stolit, që përfshijnë emra me peshë si Rashford, Eze dhe Loftus-Cheek. Edhe pse në letër duken “rezerva”, cilësia e tyre mbetet e lartë.
Marrëdhëniet sportive mes Anglisë dhe Shqipërisë nuk janë në nivel të mirë, sidomos pas incidentit në ndeshjen e UEFA Youth League mes Skënderbeut dhe Aston Villës. Për këtë arsye, Shqipëria nuk mund të mbështetet te asnjë “dhuratë” dhe duhet të sigurojë vetë rezultatin më të mirë të mundshëm ndaj Andorrës, për të mos rrezikuar objektivin historik të Play Off-it.
