Sulmuesi Rey Manaj dëshiron të largohet nga klubi Sharjah në Emiratet e Bashkuara Arabe për t’u rikthyer në futbollin turk.
Futbollisti pritet të udhëtojë personalisht drejt Turqisë për të negociuar një rikthim të mundshëm te skuadra e Sivasspor. Gjatë qëndrimit të tij te Sharjah, Manaj ka shënuar 6 gola në 16 ndeshje të zhvilluara që prej transferimit të tij gjatë verës.
Sivasspor, që aktualisht militon në kategorinë e dytë turke, e pati shitur sulmuesin për shumën prej 2 milionë eurosh. Pengesa kryesore në këtë lëvizje mbetet ana financiare, pasi klubi turk raportohet se nuk ka mundësi të paguajë për blerjen e kartonit të tij.
Synimi i lojtarit është gjetja e një formule transferimi që do të ishte e pranueshme për të gjitha palët e përfshira.
Bisedimet pritet të zhvillohen gjatë kësaj jave për të sqaruar të ardhmen e sulmuesit shqiptar. Aktualisht, ai ka një kontratë dyvjeçare me ekipin nga Emiratet, por kërkon ndërprerjen e saj pas vetëm pak muajsh.
