Mediat serbe raportojnë se Serbia rrezikon një dënim dyvjeçar nëse ndeshja e 11 tetorit ndaj Shqipërisë në Leskovac shoqërohet me trazira të rënda.
Një masë e tillë do të sillte përjashtimin nga kualifikueset e ardhshme, çka do të ishte një goditje për futbollin serb. Për të shmangur incidente, takimi u zhvendos nga Beogradi në Leskovac dhe nuk do të ketë shitje të lirë biletash. Ato do të shpërndahen vetëm për persona të kontrolluar, si pjesëtarë shoqatash apo fëmijë akademish.
Federata Serbe ka marrë këto masa pas frikës së përsëritjes së ngjarjeve të vitit 2014, kur sfida ndaj Shqipërisë u ndërpre dhe u vendos fitorja në tavolinë për kuqezinjtë. Për mbarëvajtjen e këtij takimi do të angazhohen forca të shumta policore dhe do të mungojnë tifozët shqiptarë. Ndeshja është klasifikuar si me rrezik të lartë sigurie dhe do të monitorohet edhe nga dy oficerë të FIFA-s.
/Cna
