Partizani triumfoi 2-1 me përmbysje ndaj Flamurtarit, në ndeshjen e javës së 25-të në Superiore. Në Vlorë, ishte një ndeshje shumë e luftuar, por në fund festa ishte për kryeqytetasit.
Kuqezinjtë nisën ndeshjen shumë mirë, duke kaluar në avantazh në minutën e 8-të, pas një supergoli të shënuar nga Maksuti.
Partizani tentoi të reagojë dhe gjeti barazimin në fundin e pjesës së parë. Arbitri akordoi penallti për Partizanin, pas konsultimit me VAR, për një ndërhyrje të gabuar ndaj Sidibe.
SHIKONI GOLAT DHE RASTET:
11 metërshin e mori përsipër pikërisht Sidibe, i cili u tregua i saktë, duke barazuar shifrat. I njëjti lojtar, përmbysi rezultatin në fillimin e pjesës së dytë, pas një gabimi në prapavijën e vlonjatëve.
Vendasit kishin mundësinë e artë për të barazuar shifrat, por në minutën e 74-t, shpërdoruan një penallti. Gjuajtja e Herald Markut, u ndal nga portieri Pano Qirko.
Të dyja ekipet kishin edhe raste të tjera, por nuk shënuan dot. Me këtë fitore, Partizani ngjitet në kuotën e 36 pikëve, në vendin e pestë, po aq pikë sa edhe Dinamo e vendit të katërt.
Flamurtari mbetet i fundit me vetëm 20 pikë të grumbulluara.
