Egnatia i ka shkaktuar Teutës humbjen e parë sezonale në Superiore. Rrogozhinasit triumfuan minimalisht në shtëpi, në duelin e javës së nëntë.
Siç edhe pritej, ndeshje nisi me spektakël, me raste në të dyja portat. Buriç dha sinjalin e parë për Egnatian, ndërsa Teuta reagoi me Arifin, gjuajtja e të cilit shkoi mbi portë.
Pas gjysmë ore lojë, Ruçi dhe Buriç iu afruan avantazhit për Egnatian, por tentativat e tyre, nuk kishin saktësinë e duhur.
Festa për vendasit shpërtheu në minutën e 43-të. Kotobelli humbi një top në afërsi të zonës dhe Albanese nuk fali, duke e ndalur topin në fundin e rrjetës, pas asistit të marrë nga Selmani.
Pjesa e parë u mbyll me këtë rezultat, ndërsa e dyta ishte më e qetë. Durrsakët e kishin të vështirë për të reaguar, ndërsa Egnatia iu afrua edhe të dytit. Pavarësisht tentativave, rezultati mbeti i pandryshuar, me Egnatian që rikthehet te fitorja, ndërsa Teuta pëson humbjen e parë sezonale.
Me këtë sukses, kampionët ngjiten në vendin e dytë me 18 pikë të grumbulluara, ndërsa skuadra bregdetare mban vendin e tretë me 14 pikë.
