Torino pritet të ndërpresë huazimin me Kristjan Asllanin, pasi nuk konsiderohet më pjesë e planeve të klubit.
Interi, i cili zotëron kartonin e lojtarit, po kërkon një destinacion të ri për mesfushorin para se të zyrtarizojë largimin e tij.
Sipas raportimeve të fundit, klubet e Sassuolo-s dhe Parmës kanë shprehur interes për shërbimet e 23-vjeçarit. Ndonëse Interi e ka sugjeruar futbollistin edhe te Fiorentina, kjo e fundit nuk ka bërë hapa konkretë së fundmi. Gjatë merkatos së verës, Asllani kishte refuzuar ofertën e Sassuolo-s dhe mundësitë për të luajtur jashtë Italisë.
Situata e tij te Torino ndryshoi papritur, duke kaluar nga një lojtar titullar në mbetjen jashtë formacionit në ndeshjen e fundit. Aktualisht, synimi kryesor mbetet gjetja e një ekipi ku ai mund të ketë minuta të rregullta deri në fund të sezonit.
