Skuadra e Partizanit po vijon përgatitjet për sfidën e radhës kundër Flamurtarit, e cila do të luhet më 22 shkurt në Vlorë, e vlefshme për javën e 25-të të Kategorisë Superiore.
Lajmi kryesor nga kampi i “Demave të Kuq” është rikthimi i sulmuesit Albers Keko në seancat stërvitore me grupin e parë. 24-vjeçari duket se ka kaluar fazën kritike të një dëmtimi të rëndë që e mbajti jashtë fushave të blerta për një periudhë prej 7 muajsh.
Ndeshja e tij e fundit zyrtare daton më 10 korrik 2025, në përballjen kundër ekipit estonez Kalju, e vlefshme për kualifikueset e Conference League.
Trajneri Oltijon Kërnaja ka tashmë një alternativë më shumë në repartin ofensiv, ndonëse stafi mjekësor po tregon kujdes të shtuar me ngarkesën fizike të lojtarit. Duke qenë se mungesa ka qenë e gjatë, Keko po integrohet gradualisht në procesin stërvitor për të rifituar ritmin e duhur konkurrues.
Klubi nuk ka përcaktuar ende një datë fikse për rikthimin e tij në fushë për një ndeshje zyrtare, duke preferuar një rikuperim të plotë pa rreziqe të panevojshme.
Gjithsesi, prania e tij në stërvitje konsiderohet një “sinjal” pozitiv për Partizanin në këtë fazë vendimtare të kampionatit, ku gara për kreun po bëhet gjithnjë e më e fortë.
