Mbrojtësi i Kombëtares shqiptare, Mario Mitaj, është larguar nga Arabia Saudite për t’u rikthyer në Shqipëri, pas ndarjes nga jeta të gjyshes së tij.
Lajmi është konfirmuar zyrtarisht nga klubi i Al-Ittihad përmes një njoftimi në kanalet komunikuese, ku bordi drejtues i ka shprehur ngushëllimet më të sinqerta lojtarit dhe familjes së tij për këtë humbje.
22-vjeçari ka kërkuar leje të menjëhershme për t’u larguar drejt vendlindjes pas përfundimit të ndeshjes ndaj Al-Gharafa, kërkesë e cila është miratuar menjëherë nga stafi teknik dhe drejtuesit e klubit saudit.
Mungesa e Mitajt vlerësohet si një goditje e rëndësishme për formacionin e trajnerit Sergio Conceiçao, veçanërisht për shkak të kalendarit të vështirë. Al-Ittihad do të luajë pa mbrojtësin shqiptar në sfidën e madhe kundër Al-Hilal, e planifikuar për datën 21 shkurt në orën 20:00.
Kjo përballje në transfertë kundër pretendentëve kryesorë për titull vjen në një moment kur Mitaj po shfaqte një formë mjaft të mirë, duke u aktivizuar edhe në role të reja në fushë.
