Jose Mourinho pritet të jetë trajneri i ri i Benficas, pas shkarkimit të Bruno Lage, i cili u largua pas humbjes surprizë ndaj Qarabag në raundin e parë të Ligës së Kampionëve.
Rikthimi i portugezit te klubi i Lisbonës vjen pas 25 vitesh, pasi eksperienca e tij e parë si trajner nisi pikërisht te Benfica.
Mourinho ishte përfolur edhe më herët gjatë këtij viti për një rikthim të mundshëm, por marrëveshja nuk ishte konkretizuar deri tani.
Aktualisht 62-vjeçar dhe pa ekip, Mourinho pritet të nënshkruajë për të marrë drejtimin e Benficas menjëherë. Periudha e tij më e suksesshme në Portugali lidhet me rivalët e Portos, me të cilët fitoi trofe të rëndësishëm dhe u bë i njohur në arenën ndërkombëtare.
Ky emërim shihet si një lëvizje e fortë nga klubi, që kërkon të rikthehet menjëherë në rrugën e suksesit pas një starti zhgënjyes në Evropë.
