Trajneri i njohur, Shpëtim Duro, analizoi eliminimin e Partizanit në turin e parë të Conference League. Ai e cilësoi si goditje të rëndë për kryqytetasit humbjen në shtëpi, ndërsa theksoi se te Partizani ka më shumë drejtorë se lojtarë.
“Edhe në ndeshjen e parë në Estoni, dominoi rivali. Edhe në ndeshjen e kthimit, Kalju përdori strategji të caktuara, u mbrojt dhe shfrytëzoi atë momentin e duhur. Partizani nuk bëri para spektatorëve të vet atë lojë. Kundërshtari, thashë, një rival që është në vendin e katërt në Estoni, të eliminojë Partizanin, është një goditje e rëndë. Kjo është goditje e rëndë për të gjithë. Kjo është që duhet t’i kalojnë shkallë-shkallë turet.
Partizani është emër i madh, ka të bëjë fakti se çarë lojtarësh sjell. Partizani humbi kampionatin, u eliminua nga kupa. Është shumë e rëndësishme përzgjedhja e lojtarëve. Rëndësi ka të dish të përzgjedhësh.
Kur janë këto rezultate, krijohen situata. Aty duhet një punë e madhe, ajo që më bën përshtypje është se ka më shumë drejtues se futbollistë. Merkato, problemi i lojtarëve, ardhja e futbollistëve… Eliminimi tregoi që Partizani nuk është aty ku duhet”, deklaroi Duro.
