Shqipëria ka siguruar për herë të parë në histori kalimin në fazën “Play Off” të Botërorit. Fitorja 0-1 ndaj Andorrës i ka dhënë kuqezinjve vendin e dytë matematikisht në grup. Edhe Kosova është shumë pranë këtij objektivi, me gjithçka që do të vendoset në ndeshjen e sotme kundër Sllovenisë.
Sipas faqeve të specializuara ndërkombëtare, Shqipëria dhe Kosova janë tashmë të fiksuara në vazon 3 dhe nuk mund të ndryshojnë pozicion. Kjo bën që një përballje direkte mes dy kombëtareve të shmanget në raundin e “Play Off”-it.
Në ndeshjen e parë, të dyja ekipet do të luajnë në transfertë kundër një skuadre të vazos 2, ku bëjnë pjesë Uellsi, Hungaria, Skocia dhe Çekia. Në rast kualifikimi, kundërshtari i radhës do të vijë nga vazo 1, ku janë Italia, Turqia, Ukraina dhe Polonia.
Kështu, skenari i një përballjeje Shqipëri–Kosovë nuk është i mundur në asnjë fazë të këtij edicioni të “Play Off”-it.
