Trajneri i Kombëtares shqiptare, Silvinjo shpalli listën e lojtarëve të grumbulluar për dy ndeshjet e muajit shtator, miqësoren ndaj Gjibraltarit që do të luhet më 4 shtator në stadiumin “Europa Point”, në orën 18:00 dhe sfidën kualifikuese të Kupës së Botës kundër Letonisë më 9 shtator, në stadiumin “Air Albania”, në orën 20:45.
Në listën e brazilianit nuk kishte surpriza edhe pse mund të eksperimentonte me lojtarë të rinj për miqësoren. Vihet re për të disatën herë që Silvinjo lë jashtë lojtarët që për momentin janë shumë në formë si: Kristian Shpendi, Anis Mehmeti dhe Etrit Berisha.
Sulmuesi shqiptar që luan te Çezena ka minuta të shumta në këmbë ndërsa së fundmi shënoi edhe gol. Mehmeti, sulmuesi që aktivizohet në radhët e Bristol Sitit vijon të lihet jashtë edhe pse luan si titullar në Angli. Portieri Berisha duket se është ringjallur te Haken duke u treguar vendimtar me pritje fantastike.
Ndërsa mbrojtësi Ardian Ismajli është lënë jashtë për shkak të një dëmtimi.
