Kristjan Asllani nuk është më pjesë e projektit të Inter-it. Klubi ka vendosur ta shesë mesfushorin për të paktën 15 milionë euro, por lojtari kërkon të qëndrojë në Serie A.
Ai ka refuzuar një ofertë nga Real Betis-i në Spanjë. Inter-i e ka marrë vendimin për ta larguar shqiptarin, pas afrimit të Petar Suçiç-it, i cili tashmë ka debutuar me skuadrën.
Bologna dhe Fiorentina kanë shfaqur interes për Asllanin, por vetëm në formë huazimi. Inter-i preferon një shitje përfundimtare, ndërsa mbetet për t’u parë nëse do të gjendet një zgjidhje që kënaq të dyja palët para mbylljes së merkatos.
