Skuadra e Dinamos po kalon një moment të vështirë pas humbjes së fundit në shtëpi përballë Vllaznisë dhe barazimit me Teutën.
Përveç rezultateve negative, brenda kampit blu janë shfaqur tensione mes trajnerit Ilir Daja dhe drejtuesve të klubit lidhur me menaxhimin e merkatos.
Trajneri ka kërkuar publikisht ndërhyrje në reparte të caktuara, ndërkohë që aktualisht skuadra vuan nga mungesat e shumta për shkak të dëmtimeve. Megjithëse drejtuesit kanë propozuar disa profile lojtarësh, raportohet se trajneri i ka refuzuar këto opsione deri më tani.
Shitja e Gasamas dhe largimi i Jonuzit kanë lënë hapësira në organikë, e cila aktualisht numëron vetëm 17 lojtarë të gatshëm, ku një pjesë e tyre luajnë jashtë pozicioneve natyrale.
Koha për ndërhyrje është e kufizuar, pasi merkatoja e janarit mbyllet pas dhjetë ditësh. Drejtuesit e klubit janë shprehur të pakënaqur me performancën e fundit të ekipit në fushë. Ky ngërç mes stafit teknik dhe administratës pritet të zgjidhet para përfundimit të afatit të transferimeve.
