Kombëtarja shqiptare ka zhvilluar stërvitjen e radhës në prag të ndeshjes së rëndësishme kualifikuese ndaj Letonisë, që do të zhvillohet të martën, më 9 shtator, në stadiumin “Air Albania” të Tiranës.
Sulmuesi Myrto Uzuni u stërvit i diferencuar nga pjesa tjetër e grupit. Futbollisti ka ndier një shqetësim në kofshën e djathtë, por sipas burimeve nga stafi kuqezi, bëhet fjalë për një masë paraprake dhe jo për një dëmtim serioz. Synimi është që lojtari të mos e rrezikojë dhe të jetë gati për të dhënë kontributin e tij të plotë në sfidën e së martës.
Ndërkohë, edhe disa lojtarë të tjerë titullarë si Marash Kumbulla, Jasir Asani dhe Naser Aliji nuk kanë kryer ngarkesa maksimale, për të shmangur lodhjen apo ndonjë problem të mundshëm fizik. Për të plotësuar grupin dhe për të mundësuar zhvillimin normal të stërvitjes, Silvinjo ka afruar disa elementë nga Kombëtarja U-19.
