Dinamo i surprizoi të gjithë, duke eliminuar Hajdukun e Splitit në turin e tretë të Ligës së Konferencës. Një nga lojtarët që spikati ishte mesfushori Gasama Karamba, i cili ka qenë prej kohësh në vëmendjen e klubit kroat.
Mediat afrikane raportojnë se Hajduku e ka ndjekur lojtarin për disa muaj dhe pas paraqitjes së fundit, interesi i tyre është shtuar. Karamba ka qenë një titullar i padiskutueshëm në formacionin e Ilir Dajës dhe konsiderohet ndër lojtarët kryesorë të mesfushës së Dinamos.
Pas ndeshjes, klubi kroat mësohet se ka bërë një ofertë të parë konkrete për të siguruar shërbimet e tij. Megjithatë, lojtari nuk ka ndërmend të nxitojë për t’u larguar nga Dinamo.
Ai do të presë përfundimin e ndeshjeve në Ligën e Konferencës dhe në rast kualifikimi në fazën e grupeve, pritet të qëndrojë edhe për këtë sezon.
