Ilir Daja u rikthye në stol pas dënimit të Komisionit të Disiplinës, duke drejtuar Dinamon në ndeshjen e fundit ndaj Teutës.
Megjithatë, ai nuk ka qenë i pranishëm në konferencat për shtyp para ndeshjeve të fundit, përfshirë edhe atë ndaj Bylisit. E njëjta situatë është përsëritur edhe në prag të derbit kundër Tiranës.
Kjo mungesë nuk lidhet vetëm me kthimin nga dënimi, por edhe me zhvillime të brendshme në klub. Skuadra blu po kalon një moment delikat dhe trajneri ka reaguar me tone të forta ndaj lojtarëve.
Kritikat e tij kanë sjellë tension në grup, duke ndikuar edhe në komunikimin publik. Në të kaluarën, Daja ka ndjekur të njëjtin qëndrim në situata të ngjashme.
Përballja me Tiranën pritet të tregojë jo vetëm gjendjen e skuadrës, por edhe mënyrën se si trajneri do të menaxhojë marrëdhënien me mediat në vijim.
