Dragan Stojkoviç dha dorëheqjen nga drejtimi i Serbisë gjatë ndeshjes ndaj Shqipërisë, pas koreve të shumta kundër tij nga tifozët. Në minutat e fundit të takimit, ai u ngrit në këmbë, përshëndeti publikun dhe ia la drejtimin e skuadrës zëvendësit të tij.
Pas ndeshjes, Stojkoviç konfirmoi zyrtarisht largimin dhe nuk udhëtoi me ekipin drejt Andorrës për sfidën e radhës. Dorëheqja e tij është pritur pozitivisht nga një pjesë e tifozëve, por ka sjellë edhe kritika të forta nga figura të njohura të futbollit serb.
Ish-futbollisti Rade Bogdanoviç ka komentuar publikisht çështjen, duke kritikuar rrogën e lartë që trajneri kishte marrë gjatë viteve në drejtim. Sipas tij, Stojkoviç ka përfituar rreth 11 milionë euro nga Federata gjatë 4 viteve e gjysmë, përfshirë bonuset. Mediat serbe raportojnë se paga e tij fikse ishte rreth 1,4 milionë euro në vit.
Bogdanoviç ka theksuar se një trajner me një rrogë të tillë duhet të jetë më i hapur ndaj kritikave dhe përgjegjësive.
