E ardhmja e sulmuesit të Kombëtares shqiptare, Rey Manaj, mbetet ende e papërcaktuar pas vendimit për t’u larguar nga Al-Sharjah në Emiratet e Bashkuara Arabe.
Edhe pse ditët e fundit u raportua për një marrëveshje të mundshme me klubin kinez Zhejiang, bisedimet nuk janë finalizuar ende zyrtarisht.
Sulmuesi 28-vjeçar ka marrë një ofertë financiarisht të lartë nga Kina, por lojtari po shqyrton edhe opsione të tjera për karrierën e tij. Ndërkohë, klubi i Sivasporit në Turqi ka rihapur mundësinë për një rikthim të mundshëm të Manajt në kampionatin turk.
Klubi turk pritet të zhbllokojë merkaton pas shlyerjes së detyrimeve financiare në FIFA dhe i ka paraqitur një propozim konkret futbollistit. Presidenti i Sivasporit është në pritje të një përgjigjeje përfundimtare nga sulmuesi, i cili kërkon kushte të larta financiare.
Deri në këtë moment, Manaj nuk ka nënshkruar me asnjë skuadër, duke i mbajtur të hapura të dyja pistat e transferimit. Vendimi përfundimtar pritet të merret brenda ditëve të ardhshme para mbylljes së afatit kalimtar të janarit.
