Sulmuesi nigerian Abel Abah ka mbyllur zyrtarisht aventurën e tij në Europë duke u transferuar në kampionatin e Tanzanisë te skuadra e Azam FC.
23-vjeçari, i cili mbërriti te Tirana në verën e vitit 2024 me pritshmëri të larta, nuk arriti asnjëherë të linte gjurmë te bardheblutë, duke u larguar si një lojtar jashtë planeve të klubit.
Statistikat e tij me 26-herë kampionët e Shqipërisë ishin zhgënjyese: në 25 ndeshje të zhvilluara, Abah nuk shënoi asnjë gol, duke u mjaftuar me vetëm tri asistime.
Pas përvojave në Serbi dhe Shqipëri, sulmuesi anësor ka zgjedhur të vijojë karrierën larg kontinentit europian, duke kërkuar rigjetjen e formës në një realitet të ri futbollistik në Afrikën Lindore.
