Milani arriti një fitore minimale ndaj Bolognas, në një takim që u mbyll me polemika, të lidhura me një episod për penallti në minutat e fundit. Arbitri kryesor Matteo Marcenaro akordoi fillimisht 11-metërshin në favor të kuqezinjve, pas një kontakti në zonë me Nkunku. Megjithatë, pas ndërhyrjes së sistemit VAR, vendimi u anulua. Pikërisht ky moment ka sjellë diskutime të shumta në futbollin italian, duke vënë në qendër të kritikave arbitrin Marcenaro dhe përgjegjësin e VAR-it, Michael Fabbri.
Sipas raportimeve të “La Gazzetta dello Sport”, Autoriteti i Arbitrave Italianë nuk ka qenë i kënaqur me mënyrën se si u menaxhua situata. Problemi kryesor lidhet me faktin se Fabbri, gjatë rishikimit të episodit, i tregoi Marcenaros vetëm pamjet e kontaktit mes Nkunku dhe Freuler, duke lënë jashtë monitorimit një tjetër moment më të qartë dhe më të rëndësishëm, atë të përplasjes me Lucumin. Ky veprim ka bërë që gabimi i VAR-it të konsiderohet më i rëndë se sa ai i arbitrit në fushë, i cili e kishte parë episodin në kohë reale dhe kishte marrë një vendim.
Për pasojë, autoritetet kanë vendosur të ndërhyjnë me masa disiplinore. Michael Fabbri pritet të mos jetë i pranishëm për të paktën dy ndeshje në qendrën e VAR-it, ndërsa Matteo Marcenaro do të pezullohet për një ndeshje.
