Edi Martini do të rikthehet nesër në stolin e Vllaznisë për ndeshjen kundër Partizanit, pasi është “liruar” nga dënimi që kishte.
Ai ishte pezulluar nga Komisioni i Disiplinës pas ndeshjes së javës së parë ndaj Egnatias për sjellje josportive.
Pas mungesës në takimin me Dinamon, Martini ka shlyer pjesën kryesore të dënimit. Komisioni i Disiplinës dhe Etikës shqyrtoi kërkesën e tij dhe dokumentacionin e paraqitur.
Në bazë të nenit 75 të Kodit të Disiplinës dhe Etikës, u vendos konvertimi i pjesës së mbetur të dënimit. Vendimi i lejon atij të drejtojë skuadrën në ndeshjen e ardhshme.
Kundër këtij vendimi lejohet ankim brenda tre ditëve pranë Komisionit të Apelit. Kështu, Martini rikthehet në drejtim të Vllaznisë në një ndeshje të rëndësishme të kampionatit.
