Fiorentina ka zyrtarizuar shkarkimin e trajnerit Stefano Pioli pas rezultateve të dobëta në fillim të sezonit. Skuadra vjollcë ndodhet në vendin e fundit në Serinë A, pa asnjë fitore në dhjetë ndeshjet e para, me vetëm katër barazime dhe gjashtë humbje.
Megjithëse ecuria në Conference League ka qenë më pozitive, ajo nuk mjaftoi për ta shpëtuar trajnerin. Pioli, i rikthyer te Fiorentina këtë verë pas eksperiencës në Arabinë Saudite me Al Nassr, kishte firmosur një kontratë deri në vitin 2028 me pagë 5 milionë euro bruto në sezon.
Klubi kërkonte që ndarja të bëhej me dorëheqje për të shmangur pagesën e plotë të kompensimit, por trajneri refuzoi.
Mosmarrëveshjet për pagesën e 5 milionë eurove të prishjes së kontratës çuan në ndërhyrjen e presidentit Commisso, që autorizoi shkarkimin. Përkohësisht, drejtimin e skuadrës e ka marrë Daniele Galloppa, në pritje të marrëveshjes me trajnerin Roberto D’Aversa.
