Gëzim Krasniqi, një nga mbrojtësit më jetëgjatë dhe më të respektuar të futbollit shqiptar, ka vendosur t’i japë lamtumirën futbollit të luajtur pas një karriere që u shtri në afro 17 vite.
Përmes një mesazhi në rrjetet sociale, 36-vjeçari kavajas njoftoi mbylljen e këtij kapitulli, duke shprehur mirënjohje për të gjithë klubet, trajnerët dhe tifozët me të cilët ndau rrugëtimin e tij.
Ndonëse rritur te Besa, Krasniqi ka lënë gjurmë te Partizani, klub ku mbajti edhe shiritin e kapitenit dhe të cilin zgjodhi ta ilustronte në fotot e lamtumirës.
Gjatë karrierës së tij të pasur, ai ka veshur fanellat e Flamurtarit, Kukësit, Egnatias dhe shumë ekipeve të tjera brenda e jashtë kufijve, duke fituar Kupën e Shqipërisë me verilindorët dhe titullin e Kategorisë së Parë me rrogozhinasit.
Ndeshjet e fundit mbrojtësi i luajti me Ilirinë e Fushë-Krujës, duke u tërhequr si një lojtar që spikati gjithmonë për disiplinën dhe përkushtimin në fushë.
POSTIMI:
Pas 16-17 vitesh në futbollin profesionist, unë kam vendosur të mbyll një kapitull të rëndësishëm të jetës sime. Një rrugëtim i ndërtuar mbi disiplinë, përkushtim dhe respekt për lojën. Mirënjohje ndaj çdo klubi, Presidenti, trajneri, bashkëlojtari dhe tifozi që ka qenë pjesë e kësaj rruge.
