Orges Shehi ka nisur zyrtarisht punën në krye të Tiranës, ashtu siç ishte paralajmëruar ditën e djeshme. Pas largimit me konsensus të Ardian Nuhiut, tekniku durrsak ka zbritur sot në fushën e stërvitjes për të drejtuar seancën e parë, por nuk ka qenë i vetëm.
Bashkë me Shehin janë prezantuar edhe dy bashkëpunëtorët e tij besnikë, Artan Karapici dhe Sebino Plaku. Ky staf teknik punon si një bllok i vetëm prej kohësh, duke nisur nga aventura e parë te Tirana, kalimi te Partizani dhe së fundmi eksperienca në Kosovë me Ballkanin.
Rikthimi i tyre në shtëpinë bardheblu vjen në një moment delikat, pasi koha për përgatitje është e pakët.
Treshja, që e njeh mjaft mirë ambientin kryeqytetas, ka nisur menjëherë punën për të përgatitur ndeshjen e madhe ndaj Vllaznisë, sfidë e cila do të luhet këtë të premte në stadiumin “Loro Boriçi” të Shkodrës.
/CNA
