Mesfushori 16-vjeçar, Aron Babaj, është zyrtarisht lojtari më i ri i klubit të Milanit në Itali.
Talentit nga Kosova i është bashkuar akademisë kuqezi pas largimit nga skuadra e Prishtinës së Re. Klubi italian njoftoi se lojtari i lindur në vitin 2009 do të bëhet pjesë e projektit “Milan Futuro”.
Ky projekt synon rritjen dhe zhvillimin e lojtarëve të rinj me perspektivë për ekipin e parë. Babaj është pjesë e ekipeve të moshave të Kosovës, ku ka rënë në sy për performancat e tij në mesfushë.
Interes për ecurinë e tij ka shfaqur edhe drejtori sportiv, Igli Tare, i cili e ka bërë pjesë të kuqezinjve. Marrëveshja e firmosur shënon një hap të rëndësishëm për karrierën ndërkombëtare të mesfushorit prishtinas. Ky transferim konfirmon fokusin e Milanit te talentet e spikatura nga rajoni i Ballkanit.
