Trajneri Julian Ahmataj ka mbyllur zyrtarisht bashkëpunimin me ekipin kombëtar U19. Përmes një njoftimi në rrjetet sociale, tekniku ka konfirmuar largimin pas një periudhe dyvjeçare në drejtimin e kësaj grupmoshe.
Ahmataj ka shprehur mirënjohjen ndaj Presidentit të FSHF-së, Armand Duka, për mundësinë e dhënë. Gjatë mesazhit të tij, ai vlerësoi ambientin e punës dhe standardet e ngritura në institucionin e futbollit.
Trajneri ka falënderuar stafin teknik dhe bashkëpunëtorët me të cilët ndau këtë rrugëtim profesional. Gjithashtu, ai uroi sukses për lojtarët e rinj dhe kombëtaren e madhe në prag të sfidave të muajit mars. Ky vendim shënon fundin e një cikli për stolin e përfaqësueses U19.
NJOFTIMI I PLOTË
Faleminderit President Armand Duka,
Faleminderit FSHF.
Ju falënderoj për mundësinë që më dhatë që këto dy vite të drejtoj ekipin kombëtar U-19.
Të punoja në një ambient, që falë jush ka ngritur standarde europiane dhe me njerëz të mrekullueshëm që i përshtaten plotësisht këtij ambienti europian.
Faleminderit të gjithë bashkëpunëtorëve të mi, suksese te gjithe stafeve ne garat qe do vijne.
Suksese të gjithë lojtarëve shqiptarë kudo qe ndodhen, karriera juaj te jete gjithmonë ne rritje.
Suksese ekipit tonë kombëtar, dhe stafit te tij, që në mars do të na e bëjë ëndrrën “Botëror” realitet.
