Partizani ka zyrtarizuar afrimin e sulmuesit të krahut, Laorent Shabani, si përforcimin më të ri të skuadrës.
26-vjeçari i bashkohet të kuqve si lojtar i lirë, pasi mbylli aventurën e tij në kampionatin suedez me ekipin e Norrkoping.
Sipas njoftimit të klubit, Shabani ka nënshkruar një kontratë të vlefshme për një vit e gjysmë, e cila e lidh atë me kryeqytetasit deri në verën e vitit 2027. Lojtari u prezantua zyrtarisht nga drejtori sportiv, Agim Ibraimi.
Shabani ka një karrierë të gjatë në futbollin nordik, ku është formuar si futbollist dhe ka spikatur me performancat e tij. Në të kaluarën, ai ka qenë pjesë e kombëtareve të moshave të Suedisë, përpara se në vitin 2018 të luante dy ndeshje me Shqipërinë U-21.
Sulmuesi pritet t’i bashkohet menjëherë grupit nën urdhrat e stafit teknik për të qenë gati për sfidat e ardhshme.
