Viti 2026 e ka gjetur skuadrën e Chelseat pa trajner.
Klubi londinez ka zyrtarizuar këtë të enjte divorcin me italianin Enzo Maresca. Ecuria e dobët në javët e fundit dhe tensioni mes 45-vjeçarit dhe drejtuesve të klubit blu ka bërë që këta të fundit të marrin vendimin drastik.
“Me objektiva të rëndësishëm për t’u arritur, duke përfshirë këtu edhe kualifikimin në Champions League, klubi dhe Enzo besojnë se një ndryshim mund të sjellë në skuadër mundësi për ta rikthyer sezonin në binarët e duhur”,shkruhet në njoftim.
Marrëveshja për prishjen e kontratës, sipas mediave italiane, ka qenë e shtyrë edhe nga vetë trajneri, që ka pasur një takim të tensionuar me drejtuesit pas barazimit 2-2 me Bournemouth.
Mareska qëndroi në krye të Chelsea 18 muaj, duke fituar Konferencë Ligën dhe Botërorin e Klubeve.
Londinezët janë duke punuar për të gjetur pasardhësin e tij. Kandidatët e mundshëm janë Liam Rosenior, aktualisht trajner i Strasburgut, dhe Françesko Farioli i Portos. Ky i fundit ka një klauzolë 20 milionë euro me klubin portugez.
