Sulmuesi i Kombëtares shqiptare, Armando Broja, ka munguar në dy duelet e fundit të Burnley-t ndaj Crystal Palace në Premier League dhe Mansfield në FA Cup, duke ngritur pikëpyetje mbi gjendjen e tij.
Raportimet e fundit konfirmojnë se 24-vjeçari po përballet me probleme fizike, pasi ka ndjerë dhimbje gjatë një seance vrapimi. Për të evituar rreziqet, Broja i ka kërkuar klubit anglez leje për të ndjekur një trajtim të veçantë rikuperimi.
Ky vendim vjen me synimin e qartë për të qenë në formën maksimale për ndeshjet e muajit mars, ku Shqipëria do të luajë në fazën “Play-Off” kundër Polonisë.
Situata ka vënë në alarm edhe trajnerin e Kombëtares, Silvinjo, i cili e konsideron sulmuesin si një pikë kyçe për sfidën vendimtare të 26 marsit. Broja pritet të marrë ngarkesën e nevojshme fizike nën mbikëqyrjen e specialistëve për të qenë gati në kohë.
Ditët e ardhshme do të jenë përcaktuese për të parë ecurinë e rikuperimit të tij, ndërsa stafi mjekësor i kuqezinjve po monitoron situatën me interes të lartë. Shpresat janë që sulmuesi të rikthehet në stërvitje me grupin përpara grumbullimit zyrtar të Kombëtares.
