Sulmuesi i talentuar i Shqipërisë U19 dhe i Genoas, Joi Nuredini, ka pësuar një dëmtim të rëndë që do ta mbajë jashtë fushave të blerta për një kohë të gjatë.
18-vjeçari, i cili sapo kishte nisur të linte gjurmë duke debutuar edhe në Serie A, ka dëmtuar ligamentet e gjurit. Ky dëmtim vjen në momentin më të mirë të karrierës së tij, pasi Nuredini po shkëlqente në kampionatin Primavera dhe konsiderohej një lojtar kyç për të ardhmen e sulmit kuqezi.
Lojtari pritet t’i nënshtrohet një ndërhyrjeje kirurgjikale në Milano dhe do të nisë një fazë të gjatë riaftësimi. Parashikimet e para flasin për një mungesë shumëmujore, me shpresën që sulmuesi shtatlartë të jetë gati për t’u rikthyer në fund të këtij viti.
Kjo është një goditje e madhe si për klubin italian, ashtu edhe për përfaqësuesen e moshave të Shqipërisë.
