Carlo Ancelotti zbuloi listën e tij të dytë si trajner i kombëtares së Brazilit, duke lënë jashtë të gjithë lojtarët e Real Madrid, me të cilët jetoi sezone triumfi në vitet e fundit.
Tekniku italian nuk ftoi asnjë prej Vinucuis Junior, Rodrygo, Eder Militaio apo Endrick për dy sfidat e radhës në kualifikueset e Botërorit 2026 në zonën e Amerikës së Jugut.
Pesë herë kampionët e botës do të luajnë më 5 shtator në “Marakana” kundër Kilit dhe më 10 shtator në transfertë kundër Bolivisë.
Përveç lënies jashtë të “madrilenëve”, Ancelotti ka zhgënjyer pritshmëritë e mëdha të mediave braziliane për Neymar.
Sulmuesi duhet të presë ende për rikthimin e tij te “Selecao”, ndërsa objektivi i tij për të luajtur në finalet e Kupës së Botës ka marrë një tjetër goditje të rëndë.
Sa i përket lojtarëve të grumbulluar, trajneri italian ka dërguar ftesa për shumë prej futbollistëve që po shkëlqejnë në Europë, përfshirë edhe disa veteranë, si portieri Alisson, mbrojtësit Marquinhos e Alex Sandro, apo mesfushori Casemiro.
Nuk mungojnë talentet e reja të futbollit brazilian, përfshirë dy sulmuesit e Chelsea, Estevao dhe Joao Pedro.
Po ashtu, Ancelotti ka kthyer në kombëtaren e Brazilit, mesfushorin e West Ham, Lucas Paqueta dhe sulmuesin e Tottenham, Richarlison.
Në dy ndeshjet e para si trajner i “Selecao”, Anceloti ka marrë një fitore dhe një barazim, ndërsa skuadra e tij e ka siguruar kualifikimin për në finalet e “Botërorit 2026”.
